विरोधाभास

असंख्य
विरोधाभासले बनेको हुन्छ
सुक्खा पातहरूमा झुण्डिरहेको पातलो शरीर

रात रूपक हो,
जसभित्र —
मौनता स्पष्ट देखिने गरि चिच्याइरहेको हुन्छ

म त्यहीँ बसिरहेको हुन्छु प्रतिक्षामा,
भ्रामक वास्तविकतालाई
अंगालो भरि दाहसंस्कार गर्ने प्रलोभनमा,

मेरो सामुन्ने
सबैथोक धाराप्रवाह घटित भई राखेको हुन्छ

हावा पोल्छ
पुनः आफै सेलाउँछ

म भने —
स्विच अन गर्छु,
सिल्विया प्लाथका पानाहरू चपाउँछु,
केहिबेरका लागी
अघाए जस्तो हुन्छ मलाई

— अहमद साहिल