परिचय
पूर्व परराष्ट्रमन्त्री तथा नेपाल राष्ट्र बैंकका गभर्नर भेखबहादुर थापा र सार्वजनिक स्वास्थ्यविद् डा. रिता थापाकी छोरी मन्जुश्री थापाको जन्म काठमाडौंमा सन् १९६८ मा भयो। बाल्यकाल नेपाल, क्यानाडा र अमेरिका गरी तीन देशमा बित्यो। रोड आइल्यान्ड स्कुल अफ डिजाइनबाट फोटोग्राफीमा स्नातक गरिसकेपछि उनले लेखनतर्फ कलम सोझ्याइन्, र फुलब्राइट छात्रवृत्तिमा वासिंटन विश्वविद्यालयबाट सिर्जनात्मक लेखनमा स्नातकोत्तर गरिन्।
नेपाली मूलका लेखकमध्ये अंग्रेजीमा लेखेर अन्तर्राष्ट्रिय स्तरमा प्रकाशित हुने सुरुवाती नामहरूमध्ये उनी पर्छिन्।
साहित्यिक यात्रा
पहिलो पुस्तक मस्टाङ भोट इन फ्र्यागमेन्ट्स (१९९२) पछि, आफ्नै एम्.एफ्.ए. थेसिसको रूपमा सुरु गरेको उपन्यास द ट्युटर अफ हिस्ट्री (२००१) प्रकाशित भयो। तर उनको सबैभन्दा चर्चित काम भने फर्गेट काठमाडौं: एन एलिजी फर डेमोक्रेसी (२००५) हो — नेपालमा १ फेब्रुअरी २००५ को शाही कदमको ठीक केही हप्ताअगाडि छापिएको यो पुस्तक २००६ को लेट्र युलिसिस अवार्डको छोटो सूचीमा पनि परेको थियो। यसपछि उनी क्यानाडा बसाइ सरिन्।
त्यसयता उनको कलम रोकिएको छैन — कथासङ्ग्रह टिल्ड अर्थ (२००७), वातावरणविद् चन्द्र गुरुङको जीवनीमा आधारित अ बोय फ्रम सिक्लिस (२००९), उपन्यास सिजन्स अफ फ्लाइट (२०१०), निबन्ध सङ्ग्रह द लाइभ्स वी हेभ लस्ट (२०१२), र उपन्यास अल अफ अस इन अवर ओन लाइभ्स (२०१६)। रमेश विकलको अ लिफ इन अ बेगिङ बाउल (२०००) र इन्द्रबहादुर राईको देयर्स अ कार्निभल टुडे (२०१७, PEN America Heim अनुवाद अनुदानअन्तर्गत) जस्ता अनुवादमा पनि उनको योगदान छ। न्युयोर्क टाइम्समा उनका विचार-लेख पनि नियमित छापिन्छन्।